Më 19 shtator ‘24, në mjediset e Piramidës së Tiranës, Ambasada e Shtetit të Izraelit në Shqipëri organizoi edicionin e tretë të Tirana Beer Tech, tashmë një traditë e kësaj Ambasade. Edicioni i tretë u organizua në bashkëpunim me Dhomën Ekonomike të Gruas, dhe me përkrahjen e Birrës Korça dhe Bashkisë Tiranë.
Kësaj here, e ftuar e nderit në eveniment ishte Dr. Shimrit Maman, e cila ka një përvojë të pasur dhe mbresëlënëse akademike e profesionale. Ajo drejton Shërbimin e Imazheve Tokësore dhe Planetare në Universitetin Ben Gurion të Negevit në Izrael, si dhe ka drejtuar UN-SPIDER Israel Regional Support Office. Dr. Maman ka udhëhequr programe të larmishme në arsim, programe zhvillimore në fushën e shkencës, dhe është pjesë e ekipit kërkimor që ka lëshuar nanosatelitin e parë izraelit në hapësirë, në vitin 2017. Dr. Maman befasoi të ftuarit me modelin e nanosatelitit të parë izraelit lëshuar në hapësirë në vitin 2017, ku më tej u krijua një rradhë e gjatë e të ftuarve për të bërë foto me të.
Mbi pesëdhjetë të ftuarit patën mundësinë të prekin nga afër zhvillimet e fundit hapësinore dhe satelitore, si dhe mësuan të reja mbi çështje të ngjashme. Në përfundim të fjalës së Dr. Maman, pati edhe një bashkëbisedim të ngrohtë dhe goxha të gjatë, në sajë të kuriozitetit të zgjuar nga fjala e Dr. Maman.
#TiranaBeerTech është një nismë që ka për synim mbledhjen e komunitetit në një mjedis profesional e zbavitës, në shërbim të marrjes së njohurive të reja dhe zgjerimit të rrjetit akademik e profesional. Sipas informacioneve zyrtare për gazetën Intervista, Tirana Beer Tech është planifikuar të zhvillohet të paktën katër herë në vit, dhe po kthehet në një trademark të Ambasadës së Izraelit në Shqipëri.
