Në një intervistë për gazetarin Eni Shehu, Bieta Sulo është shprehur se e quan privilegj hapësirën televizive që ka në orarin e pasdites në Top Channel, në kohën kur të rriturit janë kthyer nga puna, janë duke gatuar, e duke u kujdesur për fëmijët. Sipas saj, në ekran nuk ka orare më të mira apo të këqija. Për të, çdo orar është i shenjtë dhe do përkushtimin e duhur.
Sipas Sulos, ka shumë rëndësi mënyra se si e menaxhon një situatë në televizion. Pra, në raste keqkuptimesh, detyra e moderatorit/es nuk është të “shijojë” situatën e krijuar, por të mbajë qëndrimin e duhur dhe të tregojë një pjekuri profesionale.
Mbi një projekt me bashkëshortin e saj, Alban Dudushin, shprehet se bashkëprezantimi i festivalit të fundvitit në RTSH do të ishte një ide fantastike. Duke qeshur, shton se duhet të pyesin drejtoren e festivalit, Elhaida Danin. Për Sulon, drejtimi i një spektakli me Albanin do të ishte diçka shumë e bukur jo sepse janë partnerë, por sepse kanë punuar bashkë prej shumë vitesh. Sipas saj, kanë një kimi dhe një komunikim shumë të mirë në skenë, që ajo e konsideron sukses.
