Fabjola Kuburi:- Amarda, me ardhjen e stinës së nxehtë solle edhe ti verën me projektet dhe klipet e tua. Më trego pak më shumë për klipin e sapopublikuar “Kavalieri” që është një bashkëpunim me Ratin apo jo?
Amarda Arkaxhiu:-Është një këngë që është pëlqyer shumë për të qenë e sinqertë. Gjithmonë kemi dashur që të bëjmë një bashkëpunim me Ratin, por si duket tani ishte koha e duhur. (Buzëqesh) Kjo këngë e shoqëruar me klip e titulluar “Kavalieri” me tekst dhe muzikë të Gëzim Mnerit , masterizim të Marenglen Bojës, imazhi im u kurua nga Studio Gresa dhe veshjet nga Anisa Collection. Një klip i Max Production me xhirime të realizuara tek Kalaja e Elbasanit disa dhe disa të tjera në Tiranë.
-Ndërkohë, ke përfunduar një tjetër bashkëpunim me Ledi Vokshin, me titull “Dashnia është lezeti”, si u gjetët me Ledin dhe kur del ky bashkëpunim?
– Me Ledin, jetojmë të dyja në SHBA dhe duke qenë se kemi edhe miqësi me njëra-tjetrën, më ftoi ajo për të realizuar këtë bashkëpunim. Pra, jam e ftuar e Ledit këtë herë. Kënga është inçizuar në studio më të mëdha të Neë York-ut, ku ka incizuar edhe Maraja Kerri tre albume në ato studio, të dyja jemi munduar të sjellim diçka të bukur, video është realizuar në Amerikë muzikën e ka bërë Joni Banushi, veshjet janë të gjitha përzgjedhja dhe merita jonë. Tani, presim të dalë klipi shpejt, një klip mjaft interesant dhe që jam e sigurtë që do pëlqehet!
-E kishe menduar ndonjëherë që do rregjistroje në të njëjtat studio të yjeve botërore si Maraja Kerri?
– Të them të vërtetën jo deri këtu, po kam qenë gjithmonë kërkuese për më të mirën. Fat i madh që unë rregjistroj vokalin tim aty ku e kanë rregjistruar këngëtarët më në zë në botë.
– Në tregun muzikor është e lehtë të hysh, por e vështirë të qëndrosh. Ti si arrite të qëndrosh madje të bëhesh një nga këngëtaret më të dashura për pulikun?
– Nëse dikush kërkon, gjen dhe servir atë çka do populli, besoj se ia arrin qëllimit të mbetet në këtë treg. Në të kundërt, je i dështuar akoma pa filluar. (Qesh) Unë arrita të zë vend në zemrat e publikut!I kam gjetur telat!
– Vihet re se ti zgjedh tekste pikante, me tema shumë pranë njerëzve të thjeshtë, pse kjo zgjedhje?
– Për mua, një tekst i bukur ka shumë rëndësi, sepse kënga popullore ka lindur nga gojëdhënat e popullit dhe nga shprehjet e kthyera në shkrime, ngjarje, histori. Një tekst i bukur është shumë i rëndësishëm sepse është ai që e tregon historinë, fabulën për të cilën këndoj.
– Para disa vitesh, në mos gaboj, fitove çmimin e tretë në Festivalin e Dhjetorit dhe që atëherë nuk të kemi parë në festivale. E ke lënë me kaq përsa u përket festivaleve?
– Jo, kurrë mos thuaj kurrë, thonë. Pavarësisht faktit që kam kënduar më shumë këngë popullore, kjo nuk do të thotë se e kam mbyllur me muzikën e lehtë. Duke qenë se tregu shqiptar e imponon komercialitetin (këtë duan dhe unë këtë u jap) e shoh që suksesin e gjej te popullorja, edhe pse e ndjej veten po aq mirë tek e lehta.
– Ti je nga këngëtarët më të kërkuara në gëzimet familjare kudo në Shqipëri. Do të këndosh në shumë dasma këtë verë?
– Si çdo verë, dasma pa fund, kërkësa pa fund, unë jam një, kujt t’ja prish e kujt t’ja ndreq!(Buzëqesh)
– Ti ke një tatuazh, figurën e një maceje… Ndodh t’i nxjerrësh shpesh thonjtë si macja?
– Në rastet kur më prekin aty ku s’duhet po, për shembull në personalitetin tim.
– Kur të është dashur t’i nxjerrësh thonjtë për herë të fundit?
– Jo, s’kam patur ndonjë rast, ndoshta sepse shohin tatuazhin dhe ikin! (Qesh) Kur më duhet të gërvisht, e bëj me fjalë e jo me thonj.
– Cila është filozofia jote për jetën?
– Kam qëllime të mira për jetën, për veten, familjen, publikun.
Kete shkrim mund ta lexoni te plote ne gazeten Intervista qe e gjeni në të gjitha kioskat e Shqipërisë dhe të Greqisë. Mund t’ua dergojme edhe në adresën tuaj te emailit për vetëm 99 cent në muaj. Kontaktoni me ne në inbox!
