Vjen me këngën e re “Shumë nalt”, si një femër e bukur, e plotësuar, por gjithsesi shprehet se veten nuk e ndjen shumë nalt sepse është gjithnjë me këmbë në tokë. Së shpejti, mund ta dëgjojmë me balada, pasi është e apasionuar pas kësaj rryme, ndërkohë që aspiron X Factor USA. Për më shumë rreth Xheraldina Berishës, ju ftoj të lexoni bisedën tonë…
Bukuria:
– Xheraldina, sa të ka ndihmuar pamja jote super seksi për të ecur në jetë?
Xheraldina Berisha: – Pamja të ndihmon shumë në jetë, sepse të tillë janë bërë njerëzit sot, më shumë po bazohen te pamja, sesa karakteri i njeriut, por unë them që çelësi i suksesit tim ka qenë talenti.
– Sa orë në ditë harxhon nëpër sallone bukurie?
– Nuk harxhoj fare kohë në sallone bukurie, përveçse kur kam ndonjë xhirim për videoklip, ose ndonjë intervistë në televizion. Përndryshe, për veten kujdesem vetë.
– Ç`duhet të ketë medoemos një femër që të duket bukur?
– E rëndësishme është të jetë e bukur në shpirt dhe do ta reflektojë nga jashtë. Të gjitha femrat janë të bukura.
– A e ka të vështirë një femër e bukur të gjejë një partner të denjë?
– Nuk e di për femrat e tjera të bukura, por për mua një partner i denjë do të ishte mashkulli serioz, jo vetëm i bukur.
– Pra, bukurinë te një mashkull nuk e ke kriter?
– Nuk e kam kriter bukurinë. Një mashkull mjafton të jetë i sinqertë dhe të kujdeset për mua.
– A mendon se sot më shumë rëndësi i kushtojnë paraqitjes meshkujt sesa femrat?
– Meshkujt janë ata që gjithmonë i kanë kushtuar vëmendje të bukurës, duhet ta mbash me patjetër veten që të kesh vëmendjen e tyre.
– Cilën veçon si gjënë më të bukur në trupin tënd?
– Nuk e di çfarë do kisha veçuar, se nuk e kam menduar një gjë të tillë. (Qesh)
– Ç’mendon për shprehjen “Vajzat e bukura, me mend pak”?
– Vajzat e bukura i kanë konsideruar gjithmonë si kukulla, të cilat kanë qejf të rrinë para pasqyrës, të cilat gjithmonë mendojnë të duken bukur, por unë them të kundërtën, që sot femra ka evoluar aq shumë saqë ke femra të cilat duken aq bukur dhe janë po aq inteligjente të shkolluara dhe me një punë që ua siguron jetën dhe i bën të pavarura.
– Një femër e bërë me silikon dhe plastikë, a është e bukur për ty?
– Një femër me silikon dhe plastikë, por jo e ekzagjeruar është gjithsesi e bukur për mua.
Paraja
– Xheraldina, si i ke marrëdhëniet me paranë?
– Unë them që një njeri i mençur duhet të ketë para në kokën e tij, por jo në zemrën e tij.
– Për çfarë shpenzon më shumë?
– Për rroba dhe make up.
– Sa shpenzime ditore bën?
– Nuk bëj shumë shpenzime ditore, pasi edhe nuk më del shumë kohë të dal.
– Të pëlqen të paguash gjithmonë për gjërat e tua, apo do të doje në mashkull xhentil që s`të lë të fusësh dorën në xhep?
– Më pëlqen të paguaj për rrobat e mia, sepse s`dua të jem e varur nga askush dhe gjithmonë deri më sot kam paguar vetë.
– A janë këngëtarët të pasur?
– Nuk e di, ndoshta. Ata të muzikës popullore janë më të pasurit.
– A mendon se qetësia shpirtërore nuk blihet me para?
– Qetësinë shpirtërore e gjen gjithmonë te familja jote dhe njerëzit me pozivitet rreth teje, ajo kursesi nuk blihet me para.
– Mirëpo, nëse je e varfër, a mund të jesh e lumtur?
– Paraja kurrë nuk ka arritur ta bëjë njeriun të lumtur dhe as që do ta bëjë ndonjëherë, s`ka asgjë në natyrën e parasë që prodhon lumturi. Sa më shumë para që ka dikush, aq më shumë do të dojë. Më mirë “Buk, kryp dhe zemër”. (Qesh)
– Xheraldina, a bën bamirësi?
– Po, sa herë kam mundësi dhe gjithmonë do të bëj.
Muzika
– Ke nxjerrë në treg këngën e re “Shumë nalt”… Sa nalt e ndjen veten?
– Po, kam nxjerrë këngën “Shum Nalt”, në të njëjtën kohë edhe këngën time të parë solo. Veten nuk e ndiej nalt, por gjithmonë me këmbë në tokë.
– Ç’ka të veçantë kjo këngë?
– Kjo këngë është shumë ritmike dhe verore, për klab. Si e tillë, edhe pëlqehet nga shumë grupmosha.
– Kujt ia dedikon?
– Nuk ia kam dedikuar askujt në veçanti, thjesht ua dedikoj atyre që e pëlqejnë muzikën time.
– A shkoi realizimi i saj siç e kishe menduar?
– Shumë mirë ka shkuar realizimi, por ja që kurrë nuk je i kënaqur 100% me veten.
– Pate sponsor për këngën?
– Shpenzimet e klipit i kam bërë vetë, ndërsa për këngën jam në bashkëpunim me kontratë me Massive Productions.
– Pas kaq vitesh në tregun muzikor, a mendon se ka diçka që mund ta ndryshosh me muzikën tënde?
– Për momentin, do të mbaj këtë ritëm. Për më vonë, nuk i dihet, ndoshta do ndalem aty ku më pushon shpirti, te baladat.
– Dëgjojmë se mes këngëtareve ka edhe xhelozi… Ti, e ke hasur?
– Aspak jo, nuk ndiej xhelozi për asnjërën. Më vjen keq vetëm kur shoh ato që s’e meritojnë që s`kanë lidhje me muzikë e vetëm kanë para dhe duken në televizione, ndërsa unë njoh shumë artiste dhe talente të reja të cilat këndojnë, vallëzojnë e të gjitha i kanë dhe nuk u jepet mundësia, sepse nuk kanë kushte të ecin para.
– Sa këngëtarë i ke edhe miq të mirë?
– Nuk kam asnjë mike këngëtare, nuk jam shumë e shoqëruar me to.
E ardhmja jote
– Si do të të shikojnë fansat e tu pas 10 vitesh?
– Nuk do të kisha thënë “fansa”, sepse adhurues ka vetëm Zoti dhe vetëm ai e meriton të adhurohet, por ata të cilët e pëlqejnë muzikën time mbas 10 vitesh, them që ndoshta do më shohin me arritje akoma më të mëdha.
– Dimë që këndon edhe në diasporë… Të ardhmen e shikon në atdhe, apo jashtë vendit?
– Të ardhmen e shoh në X FACTOR USA, por se sa do të realizohet, i mbetet kohës.
– Do fokusohesh vetëm në muzikë, apo aspiron ndonjë fushë tjetër?
– Për momentin jam e fokusuar vetëm në muzikë, por kam edhe për të përfunduar studimet te Gjuhët e Huaja.
– Një rrymë muzikore që s`do të mund ta këndoje kurrë?
– A ka rrymë muzikore që s`do të mund ta këndoja?! (Qesh) S’besoj se ka. Nuk e kam problem; të gjitha rrymat me gjithë qejf do t’i kisha kënduar.
– Planet për të krijuar një familje janë të afërta, apo të largëta?
– Planet për të krijuar familje për mua janë primare, por se sa do ta gjej fatin e jetës, nuk i dihet. Shpresoj të ndodhë në një të ardhme të afërt.
– Një pasion që do ta ndjekësh ndër vite?
– Muzikën dhe vetëm muzikën.
– Çfarë nuk do të ndryshojë te ti edhe mbas shumë kohësh?
– Edhe mbas shumë kohësh nuk do të ndryshojnë flokët e mia. Gjithmonë do t’i mbaj natyrale kështu siç janë, kaçurrele.
Bisedoi: Rita Rrjolli
