ERION VELIAJ DHE HALIM KOSOVA
Pa dyshim, ishin “yjet” e kësaj jave dhe ne menduam t’u bënim një intervistë të përbashkët, dy kandidatëve për bashkinë e Tiranës, Erion Veliajt dhe Halim Kosovës. Do të pranonin vallë ata të uleshin përballë njëri-tjetrit në një tavolinë? Cilin shikojnë si avantazh të tyre dhe pikë të dobët të kundërshtarit? Ç’do të bëjnë ata më shumë se paraardhësit e tyre në krye të bashkisë? Ja, këto dhe të tjera pyetje si këto, deshëm t’u pyesnim në një intervistë të përbashkët zotërinjve Veliaj e Kosova, por nuk mundëm këtë javë. Shpresojmë që javët e ardhshme t’i kemi të dy përballë njëri-tjetrit, në faqet e gazetës sonë…
EDI RAMA
“Si do t’i vejë halli varfërisë së njerëzve?”, deshëm të pyesnim këtë javë zotin Rama, kryeministrin tonë, por nuk mundëm, se ai ishte në lëvizje gjithë javën, sa në Emiratet e Bashkuara Arabe, sa në Vlorë etj. Deshëm t’i bënim këtë pyetje se ka kohë që nuk e kemi dëgjuar të përmendë të varfërit në fjalimet apo statuset e tij në Facebook. Edhe kur gazetarët e pyetën të enjten në Vlorë për njerëzit që po ikin nga Shqipëria, ai nuk tha asnjë fjalë për arsyet se pse po ikin këta njerëz, se ç’po bën e ç’do të bëjë ai që këta fatkeqë të rrinë në vendine tyre, por foli vetëm për trafikantë të organizuar që gënjenin njerëzit e kërkonin të përfitonin nga ata, duke i mashtruar me përrallën e azilit. Trafikantë ka në të gjithë botën, zoti kryeministër, por njerëz që ikin në masë nga vendi i tyre ka vetëm në Shqipëri dhe në Siri. Nga kjo e fundit, ikin prej luftës, ndërsa këtu nga varfëria, nga mungesa e perspektivës. E dëgjuat ambasadorin gjerman Helmut Hofman, zoti Rama, kur tha se 13 mijë shqiptarë kërkuan azil në Gjermani vetëm gjatë periudhës janar-mars 2015?! E bëni ndopak veten fajtor për këtë?! Apo fajin e kanë vetëm ata maskarenj trafikantë, zoti kryeministër?!
SAIMIR TAHIRI
Të premten, Gjykata Kushtetuese vendosi të rrëzojë propozimin e pozitës për krijimin e Byrosë Kombëtare të Hetimit. Në arsyetimin e saj, Gjykata Kushtetuese thekson se ligji për Byronë e Hetimit, është i papajtueshëm me ligjin për Policinë e Shtetit. Pse nuk bëri asnjë prononcim zoti Tahiri për këtë? A nuk e dinte ligjin zoti Tahiri kur firmosi?! Çfarë do të bëhet tani me mburrjet e tij se, sapo të krijonte këtë byro, do t’i vinte fundi krimit e korrupsionit në Shqipëri?! Po kolegëve amerikanë, ekspertë të FBI-së, që në fillim të muajit erdhën këtu për të dhënë ekspertizën e tyre për ngritjen Byrosë së Hetimit, çfarë do t’u thotë?! Dhe në fund fare, deshëm ta pyesnim zotin Ministër: Si do t’i vejë halli tani krimit? Na mbeti pa u luftuar…
SHKELQIM CANI
Shkas për t’i kërkuar një interviste Ministrit të Financave, Shkëlqim Cani, u bë një lajm, sipas së cilit, këtë javë, Ministri i Financave paraqiti strategjinë e ministrisë që ai drejton, për vitet 2014-2020. Si mund të paraqitet një strategji për vitet që kanë ikur, deshëm ta pyesnim zotin Cani? A mund të na e shpjegojë ai këtë? Mos vallë është shkruar gabim viti, që duhej të ishte 2015?! Mbase, por mos ka bërë gabim edhe kur ka shkruar vitin 2020, zoti ministër?! Se, si mund të hartojë një strategji për kohën që e kalon mandatin tënd si ministër, pa pëlqimin e opozitës, ose të paktën pa thirrur në një tryezë financierët më të njohur të vendit?! Apo zoti Cani e ka të sigurt se do të jetë ministër deri në vitin 2020?!
LEFTER KOKA
Nuk takuam dot këtë javë as Ministrin e Mjedisit, Lefter Koka. Me të, kuptohet që deshëm të bëjmë një intervistë për mjedisin që dihet se si është. Mjafton të dalësh një shëtitje nëpër qytetet tona, apo të bësh një udhëtim buzë lumenjve dhe vetvetiu të vijnë dhjetëra pyetje për ministrin Koka dhe për ministrinë që ai drejton. Por zotin Koka këtë herë deshëm ta pyesnim për diçka më konkrete: Në faqen e internetit të ministrisë lexuam para disa ditësh se “sot më datë 10.04.2015, Inspektoriati Shtetëror i Mjedisit dhe i Pyjeve vendosi të pezullojë aktivitetin e shoqërisë “Kurum international Sh.a” në qarkun e Elbasanit”… Por, çfarë ndodhi në fakt? Edhe pse kanë kaluar shtatë ditë nga ky vendim, “Kurumi” vazhdon punën e, bashkë me të, edhe nxjerrjen e tymrave e duke ndotur mjedisin në Elbasan. E di ministri këtë, apo është mjaftuar me një shkresë drejtuar Kurumit dhe e ka quajtur të zgjidhur këtë problem?! Nëse e di, pse nuk zbaton ligjin që zbatohet kur për një dyqan apo ndërmarrje të vogël ka urdhër për ndalim aktiviteti?! Pse për këto thirret menjëherë policia dhe i vihet dryni? Pse nuk zbatohet i njëjti standard edhe për “Kurumin”? Apo mjafton spektakli me shkresa e publikime në internet?!
(Gazetën “Intervista”, të plotë, mund ta blini online, që ditën e daljen në treg, vetëm për 89 cent, në: http://www.pressreader.com/albania/intervista)
