Mjafton të themi Marsela Hoxha dhe emri përnjëherësh lidhet me imazhin e saj, që mbush ekranin e Mad Tv, televizionit muzikor më të ndjekur shqiptar nga të rinjtë dhe jo vetëm. Marsela prezanton emisionin “UK Top” ku rendit këngët më të pëlqyera në Britaninë e Madhe. “Mad traficc” është gjithashtu një emisioni i saj, por këtë herë radiofonik, në Radio Mad. Ajo ka qenë bashkëprezantuese e edicionit të vitit 20014 të Kënga Magjike, eksperiencë që i ka lënë shije të jashtëzakonshme dhe që do të donte të ripërsëritej. Marsela është e prerë në përgjigje, madje herë-herë duket njëfarë sarkazme e këndshme që të bën për vete. Kjo ka qenë ndoshta ajo që bën atë një “mad” në “Mad Tv”…
Fabjola Kuburi: – Përshëndetje, unë jam Fabjola…
Marsela Hoxha: – Përshëndetje, unë jam Marsela. Gëzohem që u njohëm.
– Nëse do të të kërkoja të tregoje pak më shumë për veten, do të thoje…
– Nuk do të pushoja së foluri për veten, por po them thjesht që, për pak ditë bëhem plot çerek shekulli jetë, kam mbaruar studimet për Marrëdhënie Publike&Komunikim, kështu që tani mund të më bëni ndonjë ofertë të mirë pune.
– Marsela, si u gjende në MAD?
– Shumë rastësisht. Mora vesh nga ime motër që do hapej një televizon i ri ku kërkoheshin të rinj energjikë dhe pak të çmendur… Meqë i kam këto kritere, e provova dhe, ja ku jam.
– Me çfarë merreshe më parë?
– Punoja në marrëdhëniet me publikun.
– A ka një simotër ky emision jashtë kufijve?
– Sigurisht që ka, nuk është tërësisht ky format që unë prezantoj në Mad, por ka klasifikime për këngët dhe albumet më të mira në Britaninë e Madhe.
– Ti ke qenë bashkëprezantuese në Kënga Magjike 2014. Si ishte për ty ajo eksperiencë?
– Eksperienca ishte super, e papërshkrueshme! Uroj vetëm të kem fatin të përjetoj sërish ato lloj emocionesh!
– Përveç faktit që është një televizion i ri, besoj se të ka joshur edhe pagesa… Thuhet se te ju, rrogat janë shumë të larta… Sa e ke ti, për shembull?
– Për moshën dhe pagën, nuk pyetet. (Buzëqesh)
– Një e diplomuar në Marrëdhënie Publike&Komunikim, si e sheh të ardhmen profesionale?
– E shikoj në profesionin tim, por sigurisht, pa hequr dorë nga televizioni.
– A ka një moment kur nuk preferon të dëgjosh muzikë?
– Vetëm në ato raste kur duhet mbajtur një minutë heshtje. Muzika më mbush shpirtin, ndaj e kam gjithmonë me vete.
– Cili është kritiku yt më i mirë?
– Vetja është kritiku më i rreptë. Më pas, nëna dhe motra ime.
– Prezantimi ka qenë synimi yt apo ke dashur diçka tjetër?
– Të qenurit prezantuese siç e përmenda më sipër, erdhi në mënyrë shumë rastësore. Më pas kuptova që e dashuroja.
– Çfarë të mungon, momentalisht?
– Epo, ja, nga t’ia nis? Një shtëpi në bregdet, një makinë, dy fëmijë dhe një qen me emrin Lesi. (Buzëqesh)
– Më dukesh tip solar dhe e lirshme… Do të më korrigjosh apo kam të drejtë?
– I ke rënë pikës!
– Tani lind pyetja: Çfarë mund ta acarojë një njeri kaq solar?
– Shumë fenomene që na rrethojnë, por te njerëzit më acaron të qenit pasivë dhe lajkat.
– Çfarë do të të vinte vërtet në siklet?
– Ta dija që më janë grisur pantallonat, kur jam në një vend me shumë njerëz. (Buzëqesh)
– Arrin ta dallosh gjithnjë të vërtetën nga e pavërteta?
– Përfundimisht, po dhe siç e thashë më sipër, është diçka që më acaron. Më pëlqejnë njerëzit e vërtetë.
– Cila do të ishte një e papritur e bukur për ty, në këtë moment?
– Një biletë për të bërë një xhiro rreth botës.
– Mendimi i parë që të vjen sapo e sheh veten në ekran?
– Marsela, ka ende shumë punë për të bërë…
– Nëse do të ishe një aromë, cila do të ishte ajo?
– Më nuhat dhe ma thuaj. (Qesh)
– Kur një gënjeshtër mund të quhet e nevojshme?
– Kur gënjeshtra bëhet për një qëllim të mirë.
– Në ç’gjendje shpirtërore je tani që po flasim?
– Me shumë energji për t’iu përkushtur vetes dhe jetës sime profesionale.
– Cili është sendi yt më i çmuar?
– Nuk kam sende të çmuara, vetëm njerëz të tillë.
– Nëse mbyll sytë tani, ku e shikon veten?
– Në Kubë, me një mohito në dorë, duke kërcyer salsa.
– Çfarë e bën një njeri të mirë dhe çfarë e bën atë të keq?
– Humanizimi është virtyti që e kanë vetëm njerëzit e mirë. Ligësia është një term që nuk ka kufi.
– A e konsideron veten të suksesshme në punën që bën?
– Besoj se jam duke ecur në rrugën e duhur, por siç thashë edhe më sipër, kam ende shumë punë për të bërë.
– Çfarë mendon për martesën?
– Është një etapë e jetës për të cilën jam shumë pro dhe nuk më frikëson. E vetmja gjë së cilës i druhem, do të ishte shuarja e pasionit dhe e dashurisë.
– A është bukuria sot një nga gjërat që shitet më lehtë?
– Bukuria ngelet një trampolinë e mirë për të kapërcyer më lehtë disa etapa paraprake, por është aftësia, talenti dhe përkushtimi ato që japin rezultate.
– Përveç televizionit, çfarë ta merr pjesën tjetër të kohës?
– Emisioni i përditshëm “Mad Traffic” në Radio Mad 105.7, zë një pjesë të mirë të ditës sime. Më pas, familja, shoqëria, ndonje libër i mirë dhe palestra, që është bërë pjesë kohët e fundit.
– Si do të ishte bota në përfytyrimin tënd?
– A ka mjaftueshëm hapësirë në gazetën tuaj për t’i dhënë një përgjigje kësaj pyetjeje? Nuk do të pushoja në këtë çështje…
– E lë botën tënde të brendshme t’i ekspozohet botës jashtë?
– Pjesërisht, po.
– Ka një festë apo eveniment që të pëlqen në veçanti?
– Më pëlqen dita e lindjes dhe koncertet live.
– E ndjen veten të plotësuar apo ke nevojë për diçka?
– E paske vendosur të zbërthesh anën time emocionale. Si fillim, një master. Të tjerat, gjatë rrugës.
– Një tipar që nuk e duron dot te të tjerët…
– Servilizmi dhe mosmirënjohja.
– Një tipar fizik që nuk të pëlqen te vetja…
– T’i kisha sytë jeshilë, nuk do të kishte qenë keq.
– Çfarë i bën të veçanta ditët e tua?
– Mundohem ta thyej monotoninë me aktivitete të ndryshme, me të qeshura me shoqen time të ngushtë dhe lajme të mira, që i marr herë pas here.
