Vuan nga anemia? Simptomat e këtij problemi që haset shpesh mund të ndryshojnë sipas shkaqeve dhe gjendjes shëndetësore të secilit prej nesh, por disa sinjale paralajmëruese janë të dukshme dhe njohja e tyre bën të mundur të ndërhyhet sa më shpejt për të zgjidhur problemin. Sipas ekspertëve, është mirë t’i kushtoni kujdes mungesës së hekurit, acidit folik dhe vitaminës B12. Ja, disa simptoma të anemisë që nuk duhet t’i nënvlerësoni…
1. Ndjesi lodhjeje
Ndjesia e lodhjes, humbja e papritur dhe e pamotivuar e energjive është një nga simptomat më të zakonshme të anemisë. Disa persona mund të kenë edhe përgjumje, megjithëse flenë aq orë sa duhet. Kjo simptomë mund të jetë në bazë të shqetësimeve të tjera të anemisë. Nëse keni dyshime, më mirë konsultohuni me mjekun.
2. Takikardi
Një simptomë tjetër e anemisë, që konsiderohet si e shpeshtë, është takikardia, sidomos gjatë shtimit të ritmit të zemrës kur bën një ushtrim fizik. Në disa situata, për shembull, pas një vrapi të gjatë, ky fenomen mund të jetë normal, por nëse rrahjet e zemrës shtohen edhe pas një sforcimi minimal, këshillohet të shkoni te një doktor.
3. Djegie të gjuhës
Ndër simptomat e anemisë, e shkaktuar nga mungesa e hekurit, gjejmë edhe djegiet e gjuhës, të shkaktuara nga myku që vesh atë. Mund të paraqitet një enjtje e gjuhës, që merr emrin glosit. Mos harroni, pra, të verifikoni gjendjen e gjuhës suaj, që është një pasqyrë e vërtetë e shëndetit.
4. Thonj dhe flokë të brishtë
Mungesa e hekurit mund të sjellë brishtësinë e thonjve dhe flokëve. Bëni sidomos kujdes nëse thonjtë dhe flokët këputen lehtësisht. Në këtë rast, ushqimit tuaj mund t’i mungojë hekuri, ose organizmi juaj e ka të vështirë ta thithë atë. Përsa u përket thonjve, anemia nga mungesa e hekurit mund të shkaktojë atë që quhet kilonikia, ku forma e thonjve është e sheshtë, bile edhe e lugët.
5. Zverdhje
Anemia dhe mungesa e hekurit mund të kenë në simptomat e tyre një zverdhje të përhapur të fytyrës dhe lëkurës. Është e nevojshme t’i kushtoni vëmendje, si shfaqjes së papritur të kësaj zverdhjeje, ashtu edhe gjendjeve kur ajo zgjat shumë. Në disa raste, kjo mund të jetë normale, në të tjera mund të jetë shenjë e anemisë, sëmundjeve të mëlçisë, apo e problemeve të qarkullimit të gjakut. Është mirë të mbani nën kontroll edhe fëmijët.
6. Ngërçe
Mos nënvlerësoni edhe shfaqjen e papritur të ngërçeve, jo vetëm gjatë stërvitjes apo ushtrimeve fizike, por edhe gjatë natës, apo kur zhvilloni aktivitetet normale të përditshme. Në disa raste, kjo mund të jetë shenjë e anemisë, ose mund të tregojë mungesën e kripërave minerale, si natriumi dhe magnezi.
7. Tharje e gojës
Ndër simptomat e anemisë gjejmë edhe tharjen e gojës, sidomos kur problemi shkaktohet nga mungesa e hekurit. Është mirë t’u kushtoni vëmendje çarjeve në anët e buzëve. Në rastin e mungesës së hekurit, mjeku mund të modifikojë ushqimin tuaj, ose t’ju këshillojë ta merrni hekurin me tableta nga goja.
8. Probleme në gjymtyrë
Nëse ndjeni mizëri në duar dhe këmbë, humbje të ndjesive në prekje, vështirësi në ecje, apo ngurtësi në gjymtyrë, këto mund të shkaktohen nga anemia që vjen si pasojë e mungesës së vitaminës B12. Mjeku mund të vendojë t’ju japë tableta apo injeksione me këtë vitaminë. Kur trupi të ketë në dispozicion sasinë e duhur të vitaminës B2, simptomat zhduken mjaft shpejt.
9. Dhimbje barku
Anemia e shkaktuar nga një shkatërrim i papritur i rruazave të kuqe (hemolizë), mund të ketë ndër simptomat e saj edhe dhimbjet e barkut. Përveç kësaj, sytë dhe lëkura mund të marrin një tonalitet të verdhë, urina mund të ngjyroset me të kuqe apo kafe dhe mund të shfaqen probleme në veshka dhe konvulsione.
10. Vështirësi në frymëmarrje
Vështirësitë e frymëmarrjes mund të paraqiten si simptomë e anemisë për shkak të mungesës së madhe të hekurit, te fëmijët. Mungesa e hekurit është e lidhur edhe me probleme në të mësuar dhe në sjellje. Anemia te fëmijët mund të mos ketë fare simptoma. Vështirësitë në frymëmarrje, zverdhja dhe lodhja, duhen konsideruar si sinjale alarmi. Sipas ekspertëve, 3% e fëmijëve nën 2 vjeç, vuajnë nga mungesa e hekurit.
Të reja
Nëse ndjehesh më i ri se ç’je, shton jetëgjatësinë
Kjo është ajo që ka dalë nga një studim anglez, i publikuar në revistën JAMA Internal Medicine, këtë javë. Studiuesit e University College London kanë marrë në studim plakjen e afro 6500 personave me moshë mesatare 66 vjeç. Ata kanë marrë në pyetje pjesëmarrësit mbi perceptimin që kishin për moshën e tyre dhe kanë krahasuar përgjigjet e tyre, me të dhënat që kishin mbi vdekjen. Kështu, tek ata që ndjeheshin më të rinj se mosha e tyre (69,6% që mendonin se ishin 3-4 vjet më të rinj), shkencëtarët vrojtuan se niveli i vdekshmërisë ishte më i ulët (14,3%), sesa tek ata që kishin përshtypjen se kishin moshën e tyre (18,5%), apo ata që ndjeheshin më pleq (24,6%). Ata që ndjeheshin më të rinj, kishin pak shanse të vdisnin gjatë afro 8 vjetëve (në raport me momentin kur iu bë pyetja).
Si mund të shpjegohen këto rezultate?
Sipas Isla Rajpon dhe Endrju Stepto, dy autorët e studimit, ekziston një lidhje e fuqishme ndërmjet mënyrës si e percepton moshën tënde dhe sëmundjeve kardiovaskulare. Megjithatë, ata nuk kanë marrë parasysh marrëdhënien me vdekshmërinë e shkaktuar nga kanceri. Ata kanë shpjeguar gjithashtu se ata që ndjeheshin më të rinj, mund të kenë mbase “një dëshirë më të madhe për të jetuar, një ndjenjë se e zotëronin kohën dhe më shumë aftësi për të përballuar vështirësitë”, por ata mendojnë se studimet duhen çuar edhe më tej, për të analizuar më thellë “mekanizmat e këtyre lidhjeve” (ata nuk morën parasysh gjendjen shëndetësore apo zgjedhjet që kanë bërë pjesëmarrësit në jetë).
