Shkencëtarët kanadezë, pas studimesh dhe analizash të shumta në jetë dhe në laboratore, kanë arritur në përfundimin se disa nga defektet shëndetësore të njerëzve, janë pasojë e mosushqimit të rregullt të baballarëve. Ndërsa femrat që kërkojnë të bëhen nëna e zgjedhin mjaft ushqimin e tyre të përditshëm, kanë vënë re ata, meshkujt hanë ç’u del përpara, madje jo rrallë mjaftohen edhe me ndonjë sanduiç pa vlera ushqimore të plota. Sipas shkencëtarëve, ushqimi i baballarëve të rinj është për pasardhësit i barazvlefshëm me atë të nënave dhe, çdo shkelje në këtë drejtim, ka dhënë pasoja negative.
Për të minimizuar defektet e lindura te pasardhësit, sipas këtyre shkencëtarëve, organizmi i baballarëve gjatë fekondimit duhet të jetë i ngopur në radhë të parë me vitaminën B9. Këtë vitaminë e kanë në gjendjen e saj natyrale mishrat, drithrat, frutat dhe perimet-gjethe. Pikërisht këto produkte bujqësore duhet të konsumohen me përparësi nga baballarët e ardhshëm, duke lënë në harresë, qoftë edhe për njëfarë kohe, sanduiçet pa vlera të spikatura ushqimore, që përdoren “sa për të kaluar radhën”…
Ushqimi i baballarëve ndikon në shëndetin e pasardhësve të tyre
