– Avokat Aureli, e lexoj shpesh këtë rubrikë dhe më pëlqen shumë, sepse është i vetmi vend ku të paktën mund të marrim një këshillë falas. Unë kisha 7 vjet martuar, por për arsye mosmarrëveshjesh dhe tradhtie nga im shoq, u divorcuam para një viti. Ai nuk punonte, ishte shumë dembel dhe lekët që merrja, i harxhonte me dashnoret. Para ca kohësh, m’u lut të bashkohej me mua, por unë s’e dua më dhe e nxora nga shtëpia. Ai, çfarë ka bërë?! Ka gati një muaj që më ka rrëmbyer djalin e vogël, 4 vjeç. Jam ankuar në policinë këtu ku jetoj (unë jam nga Veriu) dhe policia po e kërkon. Po më ikën truri! Veç kësaj, më ka marrë edhe 5 milion lekë që kisha në shtëpi. Ju lutem, më thoni si të veproj, cila është rruga ligjore? Mos duhet të vij në Tiranë që ta denoncoj? A dënohet me këtë gjë ai? Çfarë dënimi merr? X grua.
Av. Aurel Celibashi, “Celibashi & Associates”, Email: acelibashi@gmail.com, Celular: 0672011401, 0693082255: – E nderuar zonjë, ndjej keqardhje kur lexoj këta rreshta, shqetësime që po ndeshen shumë shpesh kohët e fundit mes çifteve shqiptare, duke u kthyer në një plagë të rëndë për shoqërinë. Me sa kuptova, ju i keni kryer procedurat ligjore, si në gjykatë ku keni zgjidhur martesën, ashtu edhe në polici, ku keni bërë denoncimin. Tani, pritni çfarë përgjigjeje do t’ju kthejë policia e zonës ku jetoni. Problemin tuaj e mbulon kjo polici dhe nuk keni pse të vini në Tiranë, pasi nuk do të zgjidhni asgjë.
– Ama, mos u largoni pa marrë përgjigje nga shefi i komisariatit për fatin e fëmijës tuaj. Përsa u takon lekëve, mund të bëni edhe një denoncim tjetër për vjedhjen që ju ka shkaktuar. Gjithashtu, mos ngurroni të vini në dijeni për këtë problem edhe familjarët e tij, të cilët duhet të negociojnë, së paku që të kthejë fëmijën, pasi do të jetë e vështirë për lekët, të cilat mund t’i ketë shpenzuar. Uroj më të miren për ju dhe shpresoj të zgjidhet sa më shpejt problemi që keni. Me respekt.
Advertisement