Është një ndër këngëtaret tona më të suksesshme, që edhe pse jetojnë larg Shqipërisë, nuk resht së sjelli hite dhe muzikën më të mirë në vend. Të gjithë e njohim si motrën e Stines, por kjo nuk e ka penguar dhe as favorizuar suksesin e saj. Gjithmonë me trendet muzikore dhe me klipet që bien në sy, Alida ka ditur të tërheqë vëmendjen e mediave duke u bërë shpeshherë edhe pjesë e faqeve me thashetheme. Është një vajzë e talentuar që si gjithë vajzat e tjera, ndodh të bjerë në dashuri dhe të hedhë në vargje përjetimet e saj, siç është rasti i këngës “Vuaj”, një këngë që i dedikohet historisë së saj tetë vjeçare të dashurisë. Me sa duket, Alida është më e frymëzuar se kurrë dhe s’ka si të jetë ndryshe, sepse çdo gjë që ajo bën, merr miratimin e fansave. Të gjithë juve që doni të dini zhvillimet më të reja në jetën e saj, ju ftoj të lexoni këtë intervistë të sinqertë…
Rita Rrjolli: – Përshëndetje, e dashur Alida! Si je?
Alida Duka: – Përshëndetje miqtë e mi të “Intervistës”! Jam mirë dhe ju falënderoj që më bëni shpesh pjesë të hapësirës suaj!
– Përse në këngën tënde të fundit thua “Call me” dhe jo “Më telefono”? Pse zgjodhe anglishten, para shqipes?
– “Call me” ngjiti që në fillim kur e kompozova si këngë në angisht dhe ashtu ngeli. Nuk e mendova fare se pse anglisht, para shqipes.
– Ashtu si në titullin e këngës, kërkon shpesh të të telefonojnë?
– Besoj se e keni kuptuar që është një këngë dedikim dhe jo në përgjithësi… (Qesh)
– Në këto momente, a po pret një telefonatë nga një njeri i rëndësishëm?
– Të them të drejtën, po!
– Si është raporti yt me telefonatat; më shumë bën apo pret të tilla?
– I bëj të dyja, varet nga ditët.
– Personi me të cilin flet çdo ditë…
– S’më kalon ditë pa folur me mamin.
– Teknologjia për ty është domosdoshmëri?
– Po.
– Mesazhi më i çuditshëm që ke marrë ndonjëherë…
– Nuk më kujtohet ndonjë konkret, për momentin.
– Para pak kohësh, dëgjuam se ti do të përfaqësoje Gjermaninë në Eurovizion…
– Ai lajm ka qenë i gabuar. Unë nuk do të përfaqësoja Gjermaninë në Eurovizion, por u futa si konkuruese, me këngën “Touch me”. Ishte thjesht një shkrim që nuk u bazua askund.
– A është Eurovizioni një nga synimet e tua?
– Sigurisht! Eurovizioni është pikësynim i çdo këngëtari e, pse jo, edhe i imi.
– Menjëherë pas këngës “Call me”, po xhiron këngën “Vuaj”… Po kjo këngë, a është dedikim?
– Po, është dedikim i lidhjes sime tetë vjeçare, që sapo e përfundova.
– Domethënë, këtu ti shfaq gjithë zhgënjimin tënd?
– Mbi të gjitha, në këtë këngë, do të ketë shumë ndjenjë.
– Kur del në treg?
– Për tre javë, besoj. Klipin ia kam besuar Gold Production.
– Si ka nisur ky vit për ty?
– Realisht, 2014-a po më duket një vit i mbarë, që mbart shumë energji pozitive. Madje, më shumë se vitet e tjera.
– Në një fillim viti, a bën edhe ti si të gjithë, plane të reja?
– Ndryshe nga gjithë të tjerët, unë planet i bëj pa filluar viti. (Buzëqesh)
– Cila është dëshira më e madhe që ke tani?
– Të jem mirë më shëndet, se të tjerat vijnë vetë, me kalimin e kohës.
– Shumë këngëtare po bëhen nëna… Ti, duhet ta planifikosh diçka të tillë, apo kur ndodh… ndodh!?
– Aspak nuk e planifikoj diçka të tillë… Kur ndodh… ndodh! Mirë e the edhe ti…
– Në këtë rast, do dëshiroje vajzë, apo djalë?
– Do preferoja vajzë.
– Do të doje një familje me shumë pjesëtarë?
– Po, dua një familje të madhe.
– Qyteti ideal për të jetuar…
– Ideali për të jetuar është vendi ku unë aktualisht jetoj, në Hanover.
– Pse? Ç’gjë të veçantë ka Hanoveri?
– Nuk është se ka diçka apo nuk ka diçka… Thjesht, i ka të gjitha ato që i shërbejnë një njeriu për të jetuar në mënyrë perfekte.
– Mora vesh që për Shën Valentin ishe në Shqipëri… E vërtetë?
– Po, e vërtetë.
– Mos vallë personi i zemrës jeton në Tiranë dhe erdhe të festosh?
– Jo, kjo s`ka lidhje. Jam këtu për një koncert dhe për xhirimet e këngës “Vuaj”.
– A mund të rezistojë një dashuri në distancë?
– Po, mundet.
– E thua këtë, sepse e ke provuar edhe vetë?
– Jo, personalisht jo, nuk e kam provuar.
– Alida, a je person që zhgënjehesh lehtë?
– Jo shumë lehtë…
– Ku e shijon më shumë jetën e natës, në Shqipëri, apo në Gjermani?
– Edhe këtu në Gjermani, por edhe në Shqipëri është shumë-shumë bukur dhe shijohet më së miri.
Po, jo ose ndoshta…
– Jam zënë me një vajzë, sepse i urrej thashethemexhiet!
– Po.
– Kam dalë në mes të natës, në të ftohtë, për të pirë cigare!
– Jo.
– Jam zënë me të dashurin tim, edhe për një sms të parëndësishme!
– Jo.
– Kam harxhuar aq shumë para për rroba, sa dy ditët në vazhdim s`kam dalë nga shtëpia!
– Po.
– Kam kaluar nga gabi (rrobat e përdorura) dhe jam ndalur duke parë diçka!
– Jo.
– Jam revoltuar, sepse nuk më kanë lënë të hyja pa prenotim në diskotekë!
– Jo.
– Më ka propozuar një politikan… nuk i kam pranuar, edhe jam penduar!
– Jo.
– Rrobat e plazhit i vesh vetëm bikini!
– Jo.
– Gjysmën e femrave të Bllokut i konsideroj budallaqe!
– Jo.
– Shoqëria ime ndër vite është pakësuar!
– Jo.
– Pasuria ime ndër vite, është rritur!
– Po.
