Rrini ulur 8 orë para tavolinës së punës, ku lëvizjet janë të pakta dhe tundimet të vazhdueshme për ushqime me sheqerna dhe yndyrna?
Ja, alternativat për t’u ushqyer në mënyrë të shëndetshme!
Kur ke uri, është e vështirë ta kufizosh veten dhe i sulesh ushqimit të parë që ke më afër, për shembull, fast-food.
Qëndrimi ulur gjithë ditën para skrivanisë, pra, jeta sedentare, nuk të ndihmon të ruash peshën, aq më tepër nëse e tepron me ushqime jo të shëndetshme. Rregulli i parë: Qëndrimi pa ngrënë nuk do t’ju shpëtojë. Përkundrazi, studime të ndryshme kanë treguar se ngrënia e një snack-u të lehtë është më e spikatur (në masën 36%, më shumë se mesatarja), pikërisht tek ata që ndjekin një mënyrë të ushqyeri të balancuar dhe të rregullt. Me një fjalë, çdo 2-3 orë ke nevojë të hash diçka për t’u karikuar me energji që të duhen për të përballuar ditën e punës. Në zyrë, ushqimet me yndyrna duhen evituar, megjithëse shpeshherë janë mundësitë e vetme në dispozicion. Nëse nuk keni shumë ide, ja 10 snack të përkryer për t’u konsumuar në zyrë:
1. Më mirë të hani çdo tre orë, për t’i dhënë mundësi metabolizmit të mbetet aktiv.
2. Mos rrini pa ngrënë. Mund të zgjidhni mollën klasike, të shoqëruar, në rastin më të mirë, me një fetë buke me miell integral.
3. Evitoni ushqimet me yndyrë.
4. Mund të zgjidhni një kek të vogël, me kusht që të jetë bërë në shtëpi, të jetë i pasur me fruta të thata dhe fletë tërshëre. Me një fjalë, nuk po flasim për ëmbëlsirat e pastiçerisë, por për versionin e tyre “light”, që mund të përgatitet me perime, si për shembull, me lule kungulli.
5. Miks frutash të thata dhe drithërash. Për t’i bërë edhe më të shijshme, duhen shtuar edhe lajthitë, por mos e teproni me to. Mund të shtoni edhe fara të ndryshme, si susami, liri, etj., të preferuara për në mëngjes, pasi përmbajnë shumë fibra.
6. Edamame. Keni dëgjuar ndonjëherë për të? Është një përgatitje me bazë bishtajash soje, e pasur me fibra e proteina. Ruajeni në frigoriferin e zyrës, pastaj ngroheni në mikrovalë për nja dy minuta dhe shtoni një domate për një snack të shpejtë e të shijshëm.
7. Mollë dhe gjalpë kikiriku. Mollët janë ideale për sistemin tuaj imunitar dhe pak gjalpë kikiriku (pa e tepruar), është një burim shumë i pasur proteinash. Për një variant më të lehtë, mund të përgatisni një tjetër snack me feta molle dhe fruta të thata.
8. Frape frutash. Kjo lloj frapeje përmban pak kalori dhe shumë fruta të freskëta. Idealja do të ishte të gjeni edhe ithtarë të tjerë në zyrë, me qëllim që përgatitjen ta bëni me radhë. Mos harroni të provoni atë me fruta tropikale, apo pylli.
9. Tranguj dhe djathë me pak yndyrë. Trangujt janë të pasur me vitaminë K, shumë e mirë për kockat dhe djathi është i përkryer për kalçiumin që përmban. Përgatisni panine të vogla, tip mikrosanduiçe, duke vënë djathin, mbase edhe ndonjë fetë fileto pule dhe tranguj të freskët, apo turshi. Edhe fëmijëve u pëlqejnë.
10. Pure mollësh. Mollët, si e thamë, ndihmojnë në forcimin e imunitetit të trupit dhe për parandalimin e tipeve të ndryshme të kancerit. Pureja e mollëve, pa i shtuar sheqer, është ideale në mëngjes, sepse përmban edhe shumë fibra. Mbase mund ta përdorni në pauzën e kafesë. Mund të përgatitet duke e qëruar apo jo lëkurën dhe duke i shtuar erëza të ndryshme, që nga kanella, deri te karafili.
11. Kos i trashë (tip salce). Kosi i trashë (i kulluar nga uji), përveçse i shijshëm, është një burim kalçiumi, proteinash dhe probiotikësh, të dobishëm për aparatin tretës. Mund të miksoni në të fruta pylli, ose fruta të thata dhe drithëra.
12. Tortijat (pitet). Nëse nuk i gjeni nëpër dyqane, mund t’i përgatisni në shtëpi më parë, t’i ruani në frigorifer dhe t’i përdorni më pas. Snack-u i preferuar për pasditen, sidomos nëse shtoni edhe një banane.
13. Kokoshka. Nuk e prisnit, apo jo? Mund t’i përgatisni vetë (kanë dalë aparate për përgatitjen e tyre pa u shtuar yndyrë) duke u hedhur kripë dhe erëzat që dëshironi. Do ta shihni që edhe kokoshkat do të kthehen në një snack joshës dhe të shëndetshëm, që mund ta ndani me kolegët.